6.6.2011

Skólaslit og útskrift 10. bekkinga

Hvaleyrarskóla var slitið í 21. sinn miðvikudaginn 3. júní síðastliðinn. Skólaslitin fóru fram með hefðbundnum hætti í 1.-9. bekkjum. Byrjað var á að koma saman á sal skólans þar sem var stutt en hátíðleg athöfn. Að henni lokinni var farið inn í bekkjarstofur þar sem nemendur fengu afhentan vitnisburð og kvöddu kennara og bekkjarfélaga áður en þeir héldu út í sumarið. (Myndir)

Seinna um daginn var útskriftaratöfn 10. bekkja sem fór fram í sal Flensborgarskóla líkt og undanfarin ár. Á dagskrá voru m.a. tónlistaratriði, upplestur og ræður skólastjóra, gesta og fulltrúa nemenda. Það voru prúðbúnir og glaðir nemendur sem tóku við útskriftarskírteinunum sínum að lokinni 10 ára grunnskólagöngu sinni. Veitt voru verðlaun og viðurkenningar af ýmsum toga og að útskrift lokinni var veglegt kaffihlaðborð í boði skólans. Um leið og við þökkum nýútskrifuðum nemendum okkar fyrir samfylgdina þá óskum við þeim velfarnaðar í þeim margvíslegu verkefnum sem bíða þeirra í framtíðinni. (Myndir)

31.5.2011

Skólaslit

Skólaslit Hvaleyrarskóla verða haldin í sal skólans föstudaginn 3. júní. Foreldrar og forráðamenn eru hjartanlega velkomnir með börnum sínum.

Nemendur mæti til skólaslita sem hér segir:

Kl. 09.00   1. - 2. bekkir
Kl. 10.00   3. - 4. bekkir
Kl. 11.00   5. - 7. bekkir

Kl. 12.00   8. - 9. bekkir

Útskrift 10. bekkinga fer fram í sal Flensborgarskólans sama dag kl. 17.00.

31.5.2011

Söngurinn ómar á Björtum dögum

Menningarhátíðin Bjartir dagar var sett í morgun á Thorsplani. Það hefur verið árlegur viðburður síðustu ár að 4. bekkingar í grunnskólum bæjarins opni Bjarta daga. Hátíðin er venjulega haldin í tengslum við afmælisdag bæjarins sem er 1. júní en í ár var ákveðið að setja hana formlega þriðjudaginn 31. maí. Á myndinni má sjá nemendur í 4. bekk Hvaleyrarskóla fylgjast af athygli með atriði úr leikritinu um Fúsa froskagleypi sem Leikfélag Hafnarfjarðar setur upp í ár.
 

31.5.2011

Vorferð 2. bekkja til Þingvalla

Aðrir bekkir fóru saman í vorferðalag til Þingvalla síðastliðinn föstudag. Einar Sæmundsen tók vel á móti okkur í fræðslumiðstöðinni  og sýndi okkur mynd um lífið í Þingvallavatni. Síðan gengum við sem leið lá niður Almannagjá og hann sýndi okkur Lögberg og helli nokkurn sem kallaður er sönghellir. Þar tókum við lagið og þá tókum við eftir því að gæs ein sem sat efst á klettabrúninni  brast í „söng“ með okkur. Síðan gengum við niður að Flosagjá og skoðuðum okkur um þar.  Að lokum fengum við okkur nesti og fórum í  leiki. Veðrið var fínt, milt og gott. Síðan var lagt af stað heim á leið og allir voru saddir og glaðir. Við þökkum Einari Sæmundsen kærlega fyrir frábæra leiðsögn. (Myndir)

27.5.2011

Tilnefning til Foreldraverðlauna Heimilis og skóla

Hvaleyrarskóli hlaut tilnefningu til Foreldraverðlauna Heimilis og skóla árið 2011 fyrir góðan árangur í kennslu stærðfræði. Stærðfræðikennurum á unglingastigi, Gunni Baldursdóttur, Hildi Loftsdóttur og Sigríði Bárðardóttur, sem hlutu tilnefninguna voru veitt viðurkenning við hátíðlega athöfn sem haldin var í Þjóðmenningarhúsinu sl. þriðjudag.

Þess skal getið að Vinaverkefnið í Skagafirði hlaut Foreldraverðlaun Heimilis og skóla 2011.

27.5.2011

Aðalfundur Foreldrafélags Hvaleyrarskóla

Síðastliðið mánudagskvöld var aðalfundur Foreldrafélags Hvaleyrarskóla. Á fundinum voru gerðar breytingar á stjórn en nokkrir stjórnarmenn gáfu ekki kost á sér. En eftir kosningu er foreldrafélagið þannig skipað:

Gísli Hildibrandur Guðlaugsson formaður

Guðrún Erla Árnadóttir stjórnarmaður

Helga Veronica Gunnarsdóttir stjórnarmaður

Íris Erlingsdóttir stjórnarmaður

Hrund Rafnsdóttir stjórnarmaður

Björg Helga Geirsdóttir varamaður

Sigrún Haraldsdóttir varamaður

Hægt er að lesa fundargerð aðalfundar undir foreldrafélag fundargerðir. Foreldrafélagið þakkar fráfarandi stjórnarmönnum kærlega fyrir þeirra framlag.

24.5.2011

Myndir frá vorhátíð Hvaleyrarskóla

Vorhátíð Hvaleyrarskóla var haldin sl. föstudag. Tókst hún í alla staði mjög vel og skemmtu nemendur sér konunglega. Myndirnar tala sínu máli.

24.5.2011

Sumarvefur ÍTH

Nokkrar fyrirspurnir hafa borist til skólanna um sumarstarfið á vegum ÍTH. Allar upplýsingar um sumarstarfið er að finna á vefnum www.sumarvefur.ith.is, hvort sem það eru upplýsingar um vinnuskólann hjá unglingunum, íþrótta- og leikjanámskeið, skólagarða, gæsluvelli eða námskeið íþrótta- og æskulýðsfélaga. Einnig er þar að finna upplýsingar um sundstaði, menningu og útivistarsvæði í Hafnarfirði.

24.5.2011

Loftgæði vöktuð

Loftgæði á höfuðborgarsvæðinu hafa verið misjöfn síðan aska tók að berast frá gosinu í Grímsvötnum aðfararnótt 23. maí. Þá voru mæligildi svifryks há. Reikna má með að mæligildin komi til með að sveiflast áfram. Öskufall á höfuðborgarsvæðinu var samt ekkert í líkingu við það sem hefur verið fyrir austan fjall og á Suðurlandi. Mælingar hafa sýnt hátt svifryk í lofti á höfuðborgarsvæðinu á álagstímum í umferðinni, þegar vindur er sterkur og jörð þurr. Er þar að einhverju leyti á ferðinni gosaska sem þyrlast upp.

Sveitarfélög á höfuðborgarsvæðinu hafa í varúðarskyni virkjað viðbragðsáætlanir sínar í samræmi við verklag sem viðhaft var í tengslum við gosið í Eyjafjallajökli. Veðurstofa Íslands spáir áfram norðlægum áttum sem að öllum líkindum ná að halda gosösku frá höfuðborgarsvæðinu. Engu að síður er full ástæða til að tryggja viðeigandi vöktun og undirbúning vegna eldgossins. Munu heilbrigðiseftirlit á höfuðborgarsvæðinu öllu fylgjast náið með loftgæðum og vatnsbólum borgarinnar allan sólarhringinn. Verða sendar út viðvaranir og leiðbeiningar ef ástæða þykir til.

Fundir hafa farið fram þar sem fulltrúar sveitarfélaganna og viðbragðsaðila hafa rætt hugsanleg áhrif eldgossins. Yfirvöld fylgjast náið með gangi mála og vakta loftgæði á nákvæman og áreiðanlegan hátt. Verða allar fréttir af breytingum á loftgæðum sendar út jafnóðum á vefsvæði bæjarins.

Ólíklegt er talið að vatnsból spillist jafnvel þótt aska berist yfir svæðið enda er neysluvatnið fengið af allnokkru dýpi úr miklum grunnvatnsstraumum.

Íbúar eru hvattir til fylgjast vel með fréttum og kynna sér ennfremur upplýsingar og leiðbeiningar á heimasíðu Almannavarna, www.almannavarnir.is og á heimasíðu umhverfisstofnunar www.ust.is.

20.5.2011

Skipulagsdagur

Mánudagurinn 23. maí er skipulagsdagur í Hvaleyrarskóla og verður því engin kennsla þann dag.

19.5.2011

Árshátíð unglingadeildar og Versins

Árshátíð unglingadeildar Hvaleyrarskóla og félagsmiðstöðvarinnar Versins var haldin í síðustu viku. Tókst hún mjög vel og skemmtu unglingarnir okkar sér konunglega. (Myndir)

18.5.2011

Velkomin í danstíma

Dagana 19. og 20. maí bjóða nemendur í 1., 3. og 5. bekkjum foreldrum í danstíma. Nemendur munu sýna dansa sem þau hafa verið að læra. Foreldrar mæta í danstíma hvers bekkjar. Sjá stundaskrá nemenda.
                                                 
Með kveðju og von um að sjá sem flesta.

Vilborg danskennari og nemendur.

17.5.2011

Vorhátíð Hvaleyrarskóla

Vorhátíð Hvaleyrarskóla verður haldin föstudaginn 20. maí kl. 13.30-15.30. Boðið verður upp á fjölbreytt skemmtiatriði, grillaðar pylsur, popp, andlitsmálningu, fjöltefli, hoppkastala og margt fleira. (Nánar)

Við hvetjum foreldra, systkini, afa og ömmur og aðra íbúa á Holtinu

til að koma og gera sér glaðan dag með okkur.

Foreldrafélag Hvaleyrarskóla

Félagsmiðstöðin Verið

Hvaleyrarskóli

17.5.2011

Aðalfundur Foreldrafélags Hvaleyrarskóla

Stjórn foreldrafélags Hvaleyrarskóla boðar til aðalfundar mánudaginn 23. maí kl 20:00 í hátíðarsal skólans. Um leið eru allir foreldrar hvattir til að taka virkan þátt í skólastarfinu og hafa þannig mótandi áhrif á skólann okkar. Gott foreldrasamstarf er mikil auðlind í öllu skólastarfi og óhætt að segja að alltaf er nóg af skemmtilegum og fjölbreyttum verkefnum sem stuðla að aukinni velferð nemenda. (Nánar)

16.5.2011

Vorskipulag í miðdeild

Skólastarfið í maí er brotið upp með ýmsum hætti. Nemendur taka nokkur próf og einnig eru ýmsir viðburðir á dagskrá. Hér gefur að líta skipulagið hjá 6. og 7. bekk.

13.5.2011

Nýsköpunarkeppni grunnskólanna

Nú fer senn að líða að skilafresti hugmynda í Nýsköpunarkeppni grunnskólanna. Í þessari viku og þeirri síðustu var keppnin kynnt sérstaklega í 5., 6. og 7. bekk hér í Hvaleyrarskóla. Foreldrar og nemendur eru eindregið hvattir til að kynna sér þessa keppni en hún er opin öllum nemendum frá 1. – 10. bekk grunnskólans. Nánari upplýsingar fást á heimasíðu keppninnar www.nkg.is og hjá Úlfhildi Guðbjartsdóttur kennara á netfanginu ulla@hvaleyrarskoli.is.

Hvetjum við alla til að taka þátt, en þess má geta að við hér í Hvaleyrarskóla höfum oftar en ekki átt vinningshafa í keppninni.

11.5.2011

Vorskipulag í unglingadeild

Nemendur í unglingadeild þreyta nokkur próf í maímánuði, en einnig eru ýmsir viðburðir og vorferðir á dagskrá. Skipulagið er aðeins breytilegt eftir árgöngum.

11.5.2011

Skólafærninámskeið

Skólafærninámskeið verður haldið þriðjudaginn 17. maí fyrir foreldra barna sem að hefja nám við skólann í 1. bekk næsta haust. Meginmarkmið námskeiðsins er að fá foreldra til að koma á vinnustað barna sinna og kynnast því fólki sem þar starfar, skoða húsakynni og aðbúnað og síðast en ekki síst til að kynnast foreldrum væntanlegra skólasystkina barna sinna. Námskeiðið fer fram í fyrirlestrarsal skólans frá kl. 18.00-20.30. (Nánar)

5.5.2011

Brunaæfing

Í dag fór fram brunaæfing í skólanum okkar. Æfingin sem var undirbúin að þessu sinni gekk vel fyrir sig. Rýmingaráætlun skólans er að finna í Vegvísinum á bls. 18. Hér eru nokkrar myndir sem teknar voru í morgun. (Myndir)

3.5.2011

Ókeypis tannlæknaþjónusta fyrir börn

Frá 1. maí til og með 26. ágúst 2011 verður boðið upp á ókeypis, nauðsynlegar tannlækningar fyrir börn tekjulágra foreldra/forráðamanna yngri en 18. Tannlæknar í tannlæknadeild Háskóla Íslands meta hvað teljast nauðsynlegar tannlækningar og þar er þjónustan veitt.

Tekið er við umsóknum frá 28. apríl til og með 1. júní 2011. (Meira)

3.5.2011

Myndir frá alþjóðlega dansdeginum

Það var mikið fjör í Hvaleyrarskóla á alþjóðlega dansdeginum þann 29. apríl. Nemendur höfðu verið að læra sérstakan dans í tilefni dagsins og dönsuðu hann af hjartans list. (Myndir)

28.4.2011

Alþjóðlegi dansdagurinn á morgun

Alþjóðlegi dansdagurinn 29. apríl var kynntur til sögunnar árið 1982 af Alþjóða leikhússtofnuninni (ITI) innan UNESCO og hefur verið haldinn hátíðlegur um heim allan síðan.

Markmið dagsins er að auka sýnileika dansins í samfélagi okkar, sýna fram á mikilvægi hans og hvetja stjórnvöld til þess að veita dansinum þann stuðning sem honum ber á öllum stigum skólakerfisins.

Nú í ár  var saminn sérstakur dans fyrir þennan dag á Íslandi og danskennarar verið hvattir til að kenna hann. Hér í Hvaleyrarskóla hafa nemendur verið að læra þennan dans og munum við að sjálfsögðu dansa hann í skólanum föstudaginn 29. apríl. 

19.4.2011

Unnu til verðlauna á skólaskákmóti Hafnarfjarðar

Sóley Lind Pálsdóttir í Hvaleyrarskóla varð skólaskákmeistari í yngri flokki á skólaskákmóti Hafnarfjarðar sem haldið var á Ásvöllum 12. apríl sl. Í öðru sæti varð Magni Marelsson sem einnig er í Hvaleyrarskóla. Í þriðja sæti varð Daníel Jóhannesson úr Víðistaðaskóla. Til hamingju krakkar með þennan frábæra árangur.

18.4.2011

Fjölmenni á páskabingói Foreldafélags Hvaleyrarskóla

Foreldrafélag Hvaleyrarskóla stóð fyrir páskabingói þriðjudaginn 12. apríl. Foreldrar, börn og aðrir velunnarar skólans fjölmenntu af því tilefni og skemmtu sér mjög vel eins og sjá má á þessum myndum.

18.4.2011

10. bekkir á Skólaþingi

Í lok síðasta mánaðar fóru 10. bekkirnir okkar á Skólaþing en þar fara nemendur í hlutverkaleik og fylgja í stórum dráttum reglum um starfshætti Alþingis. Nemendurnir fá tækifæri til að setja sig í spor þingmanna með því að leiða fyrirfram ákveðin málefni sem fyrir þá eru lögð til lykta á þingflokksfundum, nefndarfundum og þingfundum. Þannig er ætlunin að veita innsýn í sambandið milli atburða í samfélaginu, skoðanamyndunar, pólitískra ákvarðana og starfa Alþingis og sýna áhrif almennings, sérfræðinga, fjölmiðla og hagsmunaaðila á löggjafarstarfið. Nemendur eiga að komast að lýðræðislegri niðurstöðu með því að hlusta á og meta rök og álit annarra, tjá eigin skoðun og taka afstöðu.

Ferðin heppnaðist  mjög vel og tóku nemendur virkan þátt í þinginu og voru duglegir að taka til máls. Ekki er ótrúlegt að í hópnum leynist einhverjir framtíðar þingmenn! (Myndir)

17.4.2011

Páskaleyfi

Páskaleyfi nemenda hefst mánudaginn 18. apríl. Kennsla hefst aftur samkvæmt stundatöflu þriðjudaginn 26. apríl.

Starfsfólk Hvaleyrarskóla óskar nemendum og foreldrum þeirra gleðilegra páska.

12.4.2011

Páskabingó

Foreldrafélag Hvaleyrarskóla heldur páskabingó í dag, þriðjudaginn 12. apríl, kl. 18.00. Foreldar og börn þeirra eru innilega velkomin.

8.4.2011

Síðasti dagur innritunar í grunnskóla skólaárið 2011-2012

Eins og áður hefur verið auglýst þá er síðasti dagur innritunar nemenda í fyrsta bekk, fæddir árið 2005, í grunnskólum Hafnarfjarðar í dag.

Innritunin fer fram í grunnskólunum en einnig er hægt að sækja um rafrænt á www.hafnarfjordur.is (íbúagátt).

Nemendur eiga rétt á skólavist í sínu skólahverfi en eins og undanfarin ár geta foreldrar sótt um að hafa barnið sitt í öðrum grunnskóla og er leitast við að koma til móts við þær óskir.
Sækja þarf um vist í heilsdagsskóla (1.-4. bekk) fyrir 1. maí á www.hafnarfjordur.is (íbúagátt).

Hvaleyrarskóli s. 565 0200         hvaleyrarskoli@hvaleyrarskoli.is

Sérstök athygli er vakin á því að umsóknarfrestur um heimild til að stunda nám í sjálfstætt reknum skólum eða grunnskólum annarra sveitarfélaga á næsta skólaári er til 1. maí, sjá www.hafnarfjordur.is.

Fræðslustjórinn í Hafnarfirði

8.4.2011

Vilt þú vekja athygli á verðugu verkefni?

Foreldraverðlaun Heimilis og skóla 2011 verða afhent í Þjóðmenningarhúsinu þriðjudaginn 24. maí næstkomandi. Óskað er eftir tilnefningum til Foreldraverðlauna 2011 frá einstaklingum, félögum eða hópum sem vilja vekja athygli á vel unnum verkefnum, sem stuðla að eflingu skólastarfs og jákvæðu samstarfi heimila, skóla og samfélagsins.

Tilnefningar berist á rafrænan hátt með því að fylla út eyðublað á heimasíðu samtakanna www.heimiliogskoli.is. Síðasti skiladagur tilnefninga er 28. apríl 2011.

4.4.2011

Hittumst - hlustum - spjöllum

Upplýsinga- og samráðsfundur  um útfærslur á framkvæmd fjárhagsáætlunar fyrir skólaárið 2011 - 2012.

Boðað er til upplýsinga- og samráðsfunda  í  öllum grunnskólum bæjarins þar sem útfærslur á framkvæmd fjárhagsáætlunar fyrir næsta skólaár verða kynntar ásamt því að óskað er eftir samvinnu og samráði við skólasamfélagið um mögulegar leiðir til að ná þeim markmiðum sem sett voru fram í fjárhagsáætlun ársins. Fundurinn er kjörinn vettvangur til að koma tillögum og hugmyndum á framfæri.

Fundurinn í Hvaleyrarskóla verður annað kvöld, þriðjudaginn 5. apríl, kl. 19:30
 

DAGSKRÁ FUNDARINS  19.30 - 21.00
Ávörp:
- Guðrún Ágústa Guðmundsdóttir formaður fræðsluráðs - Fjárhagsáætlun og hagræðing í fræðslumálum
- Helgi Arnarson skólastjóri
- Sveindís Anna Jóhannsdóttir fulltrúi foreldra
Fyrirspurnir
Kaffi
Málstofur - rætt verður um mögulegar leiðir til að spara og um forgangsröðun verkefna
Guðmundur Rúnar Árnason bæjarstjóri - samantekt
 

Niðurstöður fundarins verða síðan birtar á heimasíðu bæjarins að fundi loknum.

Fræðsluráð, Skólaskrifstofa Hafnarfjarðar og Hvaleyrarskóli

30.3.2011

Glæsilegur árangur í stærðfræðikeppni Flensborgarskólans

Verðlaun voru veitt í stærðfræðikeppni grunnskólanna í Hamarssal í Flensborgarskólanum í gær, þriðjudaginn 29. mars. Viðurkenningar voru veittar fyrir 10 efstu sætin í hverjum árgangi og sérstök verðlaun fyrir efstu 3 sætin. Nemendur okkar stóðu sig frábærlega í þessari keppni og fengu alls 10 nemendur úr Hvaleyrarskóla viðurkenningu. Hér fyrir neðan má sjá árangur okkar nemenda. (Myndir)

30.3.2011

Árshátíð miðdeildar

Árshátíð miðdeildar fer fram í dag, miðvikudaginn 30. mars, kl. 17.00-19.30. Nonni diskó mun sjá um að nemendur dansi af sér skóna. Sjoppan verður opin og verða seldar flatbökur á góðu verði, 250 kr. Nemendur eru hvattir til að mæta snyrtilegir til fara. Miðaverð er 500 krónur.

29.3.2011

Úrslit í stærðfræðikeppni Flensborgarskólans

Í dag, þriðjudaginn 29. mars, verða kynnt úrslit og veittar viðurkenningar í fimmtándu stærðfræðikeppni Flensborgarskólans fyrir grunnskólanema. Athöfnin fer fram í Hamarssal Flensborgarskólans kl. 17:30. Til athafnarinnar er boðið þeim sem urðu í tíu efstu sætunum í hverjum árgangi ásamt foreldrum, kennurum og stjórnendum grunnskólanna.

29.3.2011

Góður rómur gerður að fræðslufundi fyrir foreldra

Það voru rúmlega fjörutíu foreldrar sem sátu fræðslufund um áfengis- og vímuvarnir sem haldinn var í gærkvöldi fyrir foreldra nemenda í 8. - 10. bekk. Foreldrar voru almennt ánægðir með fundinn sem var í umsjón þeirra Hjalta Þórs Björnssonar og Jónu Margrétar Ólafsdóttur hjá Lifandi ráðgjöf. Foreldrafélag Hvaleyrarskóla stóð straum af kostnaði vegna fundarins og færum við þeim bestu þakkir fyrir.

28.3.2011

Áfengis- og vímuefnafræðsla - fundur fyrir foreldra í kvöld

Fræðslufundur fyrir foreldra nemenda í unglingadeild Hvaleyrarskóla fer fram í kvöld, mánudaginn 28. mars kl. 20.00. Gert er ráð fyrir því að minnsta kosti eitt foreldri mæti fyrir hönd hvers nemanda.

Nemendur í unglingadeild hafa setið fræðslufundi á föstudag og í morgun og er það Jóna Margrét Ólafsdóttir sérfræðingur hjá Lifandi ráðgjöf sem sér um fræðsluna.

Áfengis- og vímuefnafræðslan er samstarfsverkefni Hvaleyrarskóla og Foreldrafélags Hvaleyrarskóla sem greiðir fyrir fræðsluna. 

Stöndum vörð um heilbrigða æsku - tökum þátt í forvarnarstarfi unglingunum okkar til heilla.

28.3.2011

SMT skólaleikur - 100 miða leikurinn

Í dag, mánudaginn 28. mars, hefst SMT skólaleikurinn okkar eða 100 miða leikurinn eins og hann er oftast nefndur. Á hverjum degi fá tveir starfsmenn 5 sérmerkta hrósmiða hvor og eiga þeir að veita nemendum þá fyrir rétta hegðun. Þegar nemandi hefur fengið þennan sérmerkta hvalamiða þá fer hann í afgreiðsluna og sýnir miðann og dregur númer. Miðinn er síðan límdur á viðeigandi stað upp á SMT spjaldið sem á eru 100 númer. Ritari skráir hjá sér nafn og það númer sem nemandinn dregur. Ritari sendir jafnframt tölvupóst til foreldra og lætur þá vita að þeirra barn hafi fengið þennan sérstaka hrósmiða fyrir rétta og góða hegðun og sé þar með orðinn þátttakandi í þessum leik.
 

Skólastjóri ákveður fyrirfram hvaða röð verður vinningsröð og ákveður einnig hvað verður í umbun fyrir þá sem eiga númerin í vinningsröð. Yfir þessu hvílir algjör leynd. Leikurinn vekur ávallt eftirvæntingu og ánægju hjá nemendum og er ekki ósvipaður bingói þar sem allir eru með en aðeins nokkrir vinna. Leikurinn stendur yfir í 2 vikur eða 10 skóladaga og eftir það eru úrslit kynnt og umbunin veitt í framhaldi.
 

100 miða leikurinn stendur yfir frá mánudeginum 28. mars til föstudagsins 8. apríl. Vinningsröðin verður kynnt mámudaginn 11. apríl.

24.3.2011

Lokahátíð Stóru upplestrarkeppninnar

Lokahátíð Stóru upplestrarkeppninnar í Hafnarfirði fór fram 15. mars í Hafnarborg. Margt var á dagskrá hátíðarinnar en aðalatriðið var upplestur 16 nemenda í 7. bekkjum í grunnskólum Hafnarfjarðar og Álftanesskóla.

Fulltrúar okkar í keppninni voru þeir Ingvi Freyr Óskarsson og Róbert Elís Villalobos og stóðu þeir sig með mikilli prýði og vöktu athygli fyrir góðan upplestur og flotta framkomu. Lesararnir voru allir mjög jafnir en Róbert Elís náði þeim frábæra árangri að vera í 3. sæti. Kolbeinn Sveinsson úr Víðistaðaskóla var í 2. sæti og Jökull Breki Arnarsson úr Álftanesskóla var í 1. sæti.

Efnt var til samkeppni um boðskort upplestrarkeppninnar meðal nemenda í 6. bekk í grunnskólum Hafnarfjarðar og var það Alda María Óskarsdóttir í 6. SHS í Hvaleyrarskóla sem átti verðlaunamyndina. Hægt er að smella á myndina til að sjá hana stærri.

24.3.2011

Innritun í grunnskóla skólaárið 2011-2012

Innritun nemenda í fyrsta bekk, sem fæddir eru árið 2005 verður í grunnskólum Hafnarfjarðar 4. - 8. apríl klukkan 9:00 – 15:00.

Sömu daga fer fram innritun nemenda sem flytjast á milli skólahverfa og þeirra sem flytja í Hafnarfjörð fyrir næsta skólaár. Innritunin fer fram í grunnskólunum en einnig er hægt að sækja um rafrænt á www.hafnarfjordur.is (íbúagátt).

Nemendur eiga rétt á skólavist í sínu skólahverfi en eins og undanfarin ár geta foreldrar sótt um að hafa barnið sitt í öðrum grunnskóla og er leitast við að koma til móts við þær óskir.
Sækja þarf um vist í heilsdagsskóla (1.-4. bekk) fyrir 1. maí á www.hafnarfjordur.is (íbúagátt).

Hvaleyrarskóli s. 565 0200         hvaleyrarskoli@hvaleyrarskoli.is

Sérstök athygli er vakin á því að umsóknarfrestur um heimild til að stunda nám í sjálfstætt reknum skólum eða grunnskólum annarra sveitarfélaga á næsta skólaári er til 1. maí, sjá www.hafnarfjordur.is.

Fræðslustjórinn í Hafnarfirði

23.3.2011

Vel heppnuð þemavika

Vel heppnaðri þemaviku lauk með opnu húsi sl. föstudag, 18. mars. Foreldrum og öðrum góðum gestum gafst þar tækifæri til að sjá hluta af því sem fram fór í vikunni, en  megináhersla var lögð á fjölbreytni og upplifun að þessu sinni. Hér fyrir neðan má skoða myndir sem teknar voru í þemavikunni, en þær segja meira en mörg orð um þá ánægju og gleði sem ríkti meðal nemenda og starfsfólks.

15.3.2011

Eitt gull og þrjú silfur á Íslandsmótinu í áhaldafimleikum

Þórey Kristinsdóttir í 9. ÞH stóð sig frábærlega á Íslandsmótinu í áhaldafimleikum sem haldið var um helgina. Þórey keppti til úrslita í öllum fjórum greinunum. Hún sigraði og varð þar með Íslandsmeistari unglinga í stökki, varð í 2. sæti á jafnvægisslá og gólfi og loks í 5. sæti á tvíslá. Við óskum Þóreyju hjartanlega til hamingju með þennan frábæra árangur. 

14.3.2011

Þemavika í Hvaleyrarskóla - Hollusta og hreyfing

Í morgun hófst þemavikan í Hvaleyrarskóla. Hefðbundin stundaskrá er brotin upp þessa daga og vinna nemendur að fjölbreyttum verkefnum undir yfirskriftinni Hollusta og hreyfing. Með því að smella á krækjurnar hér fyrir neðan má sjá skipulag fyrir hverja deild.

11.3.2011

Stærðfræðikeppni Flensborgarskólans

Miðvikudaginn 16. mars kl.15.00 verður haldin Stærðfræðikeppni Flensborgarskólans fyrir grunnskólanema í Flensborg. Nemendur þurfa að koma sér sjálfir á staðinn en keppnin stendur yfir í u.þ.b. eina klukkustund.

Skráning fer fram á mánudaginn hjá ritara eða með því að senda Steinar deildarstjóra tölvupóst steinar@hvaleyrarskoli.is.

Hægt er að æfa sig fyrir keppnina með því að skoða verkefnin á heimasíðunni http://flensborg.is/ebs/keppnir/index.htm.

Við biðjum foreldra að kynna þetta vel fyrir börnum sínum og hvetja þá til þess að taka þátt.

11.3.2011

Fréttir af kennaranemum

Sylvía Guðrún Eggertsdóttir kennaranemi hefur verið í æfingakennslu hjá Bjarnheiði Guðmundsdóttur í 7.BG í samanlagt 7 vikur.

Hvað mótar landið? var spurning sem lögð var fyrir nemendur í 7. BG í Hvaleyrarskóla. Út frá henni gerði hver nemandi sitt hugarkort. Eftir hugarkortsgerðina fengu nemendur að nýta netið og bækur til að afla sér upplýsinga áður en þeir fóru í að útbúa kennsluefni fyrir 5-6 ára börn sem eru á leikskólanum Hlíðarbergi. Nemendur komu með sínar hugmyndir að kennsluefni og útfærðu þær á mjög skemmtilegan hátt. Nemendur gerðu margar útgáfur af spilum, t.d. var eitt spilið samstæðuspil, annað gátuspil svo eitthvað sé nefnt Nemendur voru einnig með orðaleit fyrir börnin, þeir sömdu sögu og voru með sína eigin útfærslu af eldgosi.
 

Þegar nemendur kynntu og kenndu börnunum stóðu þeir sig frábærlega vel og voru eins og hinir fræknustu fræðimenn. Þeir sýndu börnunum mikinn áhuga og svöruðu þolinmóðir öllum spurningum frá þeim. Nemendurnir fengu mikið hrós frá starfsfólki og börnum leikskólans. Hrósin einkenndust af því hvað nemendur voru kurteisir, þolinmóðir, skemmtilegir og hugmyndaríkir. (Myndir)
 

8.3.2011

Þemavika

Í næstu viku, 14.-18. mars, verður þemavika hjá okkur í Hvaleyrarskóla. Þessa daga verður hefðbundin stundaskrá brotin upp og munu nemendur vinna í aldursblönduðum hópum að fjölbreyttum verkefnum undir yfirskriftinni Hollusta og hreyfing.

Nemendur í 1.-4. bekk mæta kl. 8.20 eins og venjulega mánudag til fimmtudags og nemendur í 5.-10. bekk mæta kl. 8.10 að venju. Nemendur í öllum deildum ljúka skóladeginum kl. 13.20 þessa daga. Föstudaginn 18. mars verður síðan opið hús í skólanum frá kl. 10.00-12.00.
 

4.3.2011

Öskudagur

Á öskudag er dagskrá í öllum deildum til kl. 11.00. Í mið- og yngri deild er öskudagsball á sal skólans og spil í heimastofum. Í unglingadeild geta nemendur valið um að taka þátt í náttfatapartíi í Ásvallalaug eða horfa á bíómynd í fyrirlestrarsal skólans. Nemendur sem eru í mataráskrift fá samlokur og drykk í lok dagskrár. Sjá nánar hér.
 

Opið er í frístundaheimilinu Holtaseli fyrir þá nemendur sem eru skráðir þar.

4.3.2011

Góður árangur í Skólahreysti

Hvaleyrarskóli tók þátt í Skólahreysti í gær en þar háðu unglingarnir okkar keppni við jafnaldra sína úr öðrum skólum í Hafnarfirði og á Suðurnesjum. Krakkarnir okkar stóðu sig mjög vel jafnt innan vallar sem utan. Eftir harða keppni hafnaði skólinn okkar í 5. sæti. Holtaskóli í Reykjanesbæ sigraði með yfirburðum en aðeins 4 stig skildu á milli 2. og 5. sætis. Keppnislið okkar var skipað þeim Ívari úr 10. bekk, Bryndísi Maríu úr 10. bekk, Hrund úr 9. bekk, Sölva úr 9. bekk, Heiða úr 9. bekk og Pétri úr 10. bekk. Þjálfarar liðsins voru íþróttakennararnir Hulda og Sigmundur og liðsstjóri var Sara Lind sem útskrifaðist frá skólanum okkar sl. vor.

3.3.2011

Skólahreysti í kvöld

Hvaleyrarskóli keppir í Skólahreysti í kvöld, fimmtudag í Smáranum í Kópavogi. Keppendur eiga að mæta á svæðið kl. 18 en rúta með stuðningsmönnum fer frá skólanum kl. 18:15 og heim að keppni lokinni kl. 21. Litur skólans í ár er bleikur, svo það er um að gera að mæta í einhverju bleiku og hvetja sitt fólk áfram. Sjá nánar hér http://www.skolahreysti.is/frett.aspx?id=124.

28.2.2011

Kennaranemar í Hvaleyrarskóla

Þessar vikurnar eru sjö  kennaranemar hjá okkur frá Háskóla Íslands, Menntavísindasviði. Það er afar líflegt að hafa þá og nokkrir þeirra hafa verið  hjá okkur í mörg misseri. Óskum við þeim alls hins besta í þeirra störfum.

25.2.2011

Heimsóknir í fjölmiðla

Nemendur í 7. bekkjum heimsóttu 365 miðla í vikunni. Börnin skemmtu sér mjög vel og fengu nýja sýn á hvernig það er að vinna í fjölmiðlum og hvernig útsendingar frá útvarpi og sjónvarpi fara fram. Smellið á heiti bekkjanna hér fyrir neðan.

24.2.2011

Skipulagsdagur á föstudag

Föstudagurinn 25. febrúar er skipulagsdagur í Hvaleyrarskóla og því fellur öll kennsla niður þann dag.

23.2.2011

Upplestrarhátíðin í Hvaleyrarskóla

Upplestrarhátíðin var haldin hátíðleg á sal skólans í gærmorgun þar sem vinningshafar úr bekkjarkeppni 7. bekkjar kepptu um að komast í Hafnarborg á Stóru upplestrarhátíðina. Upplesararnir stóðu sig allir frábærlega, en þeir sem urðu hlutskarpastir voru: Róbert Elís Villalobos, Yngvi Feyr Óskarsson og varamaður var valinn Bjarki Freyr Rebekkuson. Við óskum þeim góðs gengis í Hafnarborg. (Myndir)

16.2.2011

Grunnskólahátíð Hafnarfjarðar

Hin árlega Grunnskólahátíð Hafnarfjarðar verður haldin í dag miðvikudaginn 16. febrúar, bæði í Bæjarbíói þar sem leiksýningar fara fram og í íþróttahúsinu Strandgötu þar sem ballið verður haldið. Leiksýningarnar verða kl. 13.00 og aftur kl. 15.00 og eru foreldrar og forráðamenn velkomnir.

Ballið er síðan í kvöld þar sem fram koma m.a. DJ Haffi, Friðrik Dór, Erpur, Akademían og tvö hlutskörpustu atriðin úr Söngvakeppni ÍTH. Húsið opnar kl. 19.00 og ballinu lýkur kl. 23:30.

Athygli er vakin á því að unglingarnir fá leyfi í skólanum eftir hádegi í dag og einnig í fyrstu þremur kennslustundunum á morgun, fimmtudaginn 17. febrúar.

11.2.2011

Stormviðvörun

Stormur er nú suðvestanlands og er vindhraðinn 18-30 m/sek. Við minnum á samræmdar reglur fyrir skólana á höfuðborgarsvæðinu og biðjum fólk um að senda ekki yngri börn í skólann án fylgdar.

3.2.2011

Alþjóðlegi netöryggisdagurinn 2011

Mennta- og menningarmálaráðuneytið, innanríkisráðuneytið og SAFT standa fyrir ráðstefnu um Internetið á alþjóðlega netöryggisdaginn, þann 8. febrúar 2011 á Hilton hóteli, Nordica. (Meira)

31.1.2011

Þitt er valið - tannverndarvika 2011

Fyrsta vikan í febrúar ár hvert er helguð tannvernd og í ár er áhersla lögð á glerungseyðingu og hvernig stemma megi stigu við henni.

Af því tilefni hefur Lýðheilsustöð gefið út veggspjaldið Þitt er valið þar sem lýst er á myndrænan hátt innihaldi algengustu vatns-, ávaxta- og gosdrykkja á markaðnum og áhrifum innihaldsins á tannheilsu.

26.1.2011

Gistigleði fyrir nemendur í unglingadeild

Föstudaginn 28. janúar mun starfsfólk félagsmiðstöðvarinnar Versins bjóða unglingum upp á að dvelja í félagsmiðstöðinni yfir nótt. Viðburður þessi hefur verið kallaður „sleepover“ eða „gistigleði“.

„Gistigleði“ hefur verið hefð í félagsmiðstöðvum í Hafnarfirði í nokkur ár. Markmið þessa starfs er að unglingarnir kynnist hvert öðru betur og starfsfólk nái betri tengslum við unglingana. Við teljum þessa leið góða til að hrista hópinn saman og koma á góðum tengslum og góðum starfsanda. (Meira - Leyfisbréf)

21.1.2011

Kynning fyrir nemendur í 10. bekk og foreldra þeirra

Námsframboð 13 framhaldsskóla á höfuðborgarsvæðinu verður kynnt fimmtudaginn 27. janúar kl. 17-19 í opnu húsi í aðalsal Flensborgarskóla. Kynningin er fyrir nemendur í 10. bekk í grunnskólum Hafnarfjarðar og foreldra þeirra. Hver framhaldsskóli verður með kynningarbás og námsráðgjafar veita upplýsingar um námsframboð og inntökuskilyrði skólanna.
 

20.1.2011

Foreldradagur

Fimmtudaginn 27. janúar 2011 eru nemendur og foreldrar þeirra boðaðir til viðtals við umsjónarkennara. Kennsla samkvæmt stundaskrá fellur niður þennan dag en frístundaheimilið Holtasel verður opið.

Að loknum viðtölum eru foreldrar beðnir um að taka þátt í viðhorfskönnun. Svörunin fer fram í tölvustofu skólans nr. 33 og tekur það foreldra 10-15 mínútur að svara spurningunum. Viðhorfskönnunin er mikilvægur þáttur í sjálfsmati skólans.

17.1.2011

Skilaboð frá Ásvallalaug

Heil og sæl og gleðilegt nýtt ár með þökk fyrir samstarfið á liðnum árum. Eins og ávallt er talsvert af munum nemenda sem verður eftir í Ásvallalaug. Alltof sjaldan er fatnaður og önnur verðmæti merkt. Nú á nýju ári munum við bregða á það ráð að setja óskilamuni í körfur merktar þeim dögum sem börnin eru í skólasundi. Körfurnar verða síðan á laugarbakkanum, þ.e. mánudagskarfa á mánudögum o.s.frv.

Forstöðumaður Ásvallalaugar

10.1.2011

Gjaldskrárbreytingar í grunnskólum í janúar 2011

Heilsdagsskóli

Ákveðið hefur verið að breyta ekki gjaldskrá vegna heilsdagsskóla á vorönn 2011.

Hádegismatur

Verð á hádegismat verður 300 kr. fyrir hverja máltíð frá og með fyrsta áskriftartímabili ársins 2011.

Hækkar verðið því um 28 kr. pr. máltíð eða um 10%.

Fræðslustjóri

7.1.2011

Viðbrögð þegar skólastarf raskast vegna veðurs

Slökkvilið höfuðborgarsvæðisins (SHS) hefur gefið út samræmdar reglur fyrir grunnskóla og foreldra um viðbrögð við því þegar skólastarf á höfuðborgarsvæðinu raskast vegna veðurs og ófærðar. Reglurnar má finna í valstikunni vinstra megin á síðunni, Röskun á skólastarfi vegna óveðurs. Foreldrar eru vinsamlegast beðnir um að kynna sér þessar reglur.

17.12.2010

Starfsfólk Hvaleyrarskóla óskar nemendum sínum og fjölskyldum þeirra gleðilegra jóla og farsældar á nýju ári með þökk fyrir ánægjulegt samstarf á árinu sem er að líða.   Skólastarf hefst aftur samkvæmt stundaskrá miðvikudaginn 5. janúar 2011.

16.12.2010

Ekkert fikt
Á vef Slysavarnafélagsins Landsbjörg má finna myndbandið Ekkert fikt sem fjallar um flugeldaforvarnir. Foreldrar eru hvattir til að horfa á myndina með börnum sínum og ræða við þau um mikilvægi þess að fara í einu og öllu eftir leiðbeiningum. Myndbandið er hægt að nálgast á eftirfarandi slóð:

http://www.landsbjorg.is/assets/slysavarnirflugeldar/ekkertfikktvefformat.wmv.

15.12.2010

Hvalrekinn - fréttabréf Hvaleyrarskóla

Síðasti Hvalreki ársins er kominn út. Hvalrekinn er sendur til foreldra í tölvupósti og birtur hér á vefsíðu skólans.

13.12.2009

Hæfileikakeppni miðdeildar
Miðvikudaginn 15. desember verður haldin hæfileikakeppni og jólaball miðdeildar í Hvaleyrarskóla. Fjörið hefst kl. 17.00 og stendur til 19.30. Það kostar ekkert inn en sjoppan verður opin. Bikarar verða veittir fyrir fyrstu þrjú sætin auk þess sem allir þátttakendur fá viðurkenningaskjal.

10.12.2010

Dagskrá síðustu daga fyrir jól
Það líður senn að jólum og börnin farin að telja dagana fram að jólafríi. Skipulag jólaskemmtana í Hvaleyrarskóla má sjá með því að smella á tenglana hér fyrir neðan.

8.12.2010

Samstarf við leikskólana á Hvaleyrarholti
Farið var í heimsókn í þrjá leikskóla dagana 29. nóv. og 2. des., en það eru  leikskólarnir Álfasteinn, Smáralundur og Vesturkot. Er þetta liður í samstarfi Hvaleyrarskóla og leikskólanna og í tilefni af degi íslenskar tungu höfðu 4. bekkir og umsjónarkennarar þeirra undirbúið dagskrá. Fluttar voru vísur um jólasveinana, dansað og sungið. Voru þetta ánægjulegar stundir og móttökur góðar. Einnig var söngsamvera í Hvaleyrarskóla þann 6. des í sal skólans og komu elstu leikskólabörnin til okkar úr öllum þessum leikskólum. Tóku þau lagið fyrir okkur og einnig sungum við fyrir þau. Í lokin gæddu allir sér á mandarínum áður en þrammað var heim á leið í íslensku og stilltu vetrarveðri. (Myndir)

7.12.2010

Fjöltyngt aðventudagatal
Fjöltyngt aðventudagatal má finna á Tungumálatorgi. Á hverjum degi fram til jóla opnast nýr gluggi á dagatalinu. Þegar smellt er á glugga birtist efni tengt jólum og hátíðahöldum í desember frá ólíkum menningarsvæðum og á mismunandi tungumálum. Í dag eiga Frakkarnir sviðið.

1.12.2010

Syngjandi jól
Syngjandi jól, jólatónleikar hafnfirskra kóra, verða haldnir í Hafnarborg laugardaginn 4. desember. Fram koma fjölmargir kórar frá kl. 10.00 um morguninn til kl. 18.00 um kvöldið. Hver kór hefur 20 mínútur fyrir sína dagskrá og mun kór Hvaleyrarskóla stíga á svið kl. 13.40. Allir eru velkomnir og er aðgangur ókeypis. Þennan sama dag fer fram hið árlega jólaföndur foreldrafélags Hvaleyrarskóla, sjá neðar á síðunni.

1.12.2010

Gæðaviðurkenning fyrir Comeniusarverkefni

Á dögunum hlaut Hvaleyrarskóli viðurkenningu fyrir eitt af 10 bestu Comeniusarverkefnunum á Íslandi tímabilið 2008-2010. Viðurkenninguna hlaut skólinn fyrir verkefni sem nefnist CLIMATES. Verkefninu er ætlað ýta undir tungumálakennslu yngri barna og örva hæfileika þeirra til að eiga samskipti við aðra þrátt fyrir annað móðurmál. Samstarfsskólar okkar komu frá Ítalíu, Póllandi, Lettlandi, Bretlandi, Spáni, Tyrklandi, Rúmeníu, Svíþjóð, Eistlandi og Portúgal. Kennararnir sem eiga heiðurinn að þessari viðurkenningu eru Bjarnheiður Guðmundsdóttir, María Aðalsteinsdóttir og Sigurborg Hrönn Sævaldsdóttir.

30.11.2010

Hið árlega jólaföndur foreldrafélags Hvaleyrarskóla

Hið árlega jólaföndur foreldrafélags Hvaleyrarskóla verður haldið laugardaginn 4. desember kl. 13. Eins og í fyrra þá selur foreldrafélagið föndur á hagstæðu verði eða 500 kr. stykkið.

Boðið verður upp á kaffi og piparkökur en einnig er Verið með sjoppuna opna og selja þar  gosdrykki og gotterí. Við biðjum fólk að taka með sér skæri, liti, heftara og lím. Annan efnivið má koma með, eins og límmiða og glimmer.   

Endilega að taka ömmur og afa, frændur og frænkur með í föndrið, við bjóðum alla fjölskylduna velkomna.

26.11.2010

Með hugann fullan af hetjudraumum

Ljóðskáldið Aðalsteinn Ásberg og söngvaskáldið Svavar Knútur heimsóttu skólann okkar á samveru unglingadeildar á miðvikudaginn og fluttu brot úr verkum Steins Steinarr og sögðu frá lífi og list byltingarskáldsins. Ferill Steins var rakinn í ljóðum og söngvum, enda hafa mörg tónskáld sótt innblástur í verk hans. Ádeila, heimspeki, ást og nútími eru stikkorð sem vísa á skáldið sem átti stærstan þátt í formbyltingu ljóðsins á Íslandi.

Nemendur unglingadeildar voru góðir áhorfendur og tóku listamennirnir það sérstaklega fram að krakkarnir væru góðir hlustendur og að hér í  skólanum væri góður andi. (Myndir)

25.11.2010

Slökkviliðið í heimsókn

Slökkviliðið kom í árlega heimsókn í 3. bekki í gær í tilefni af eldvarnarviku. Nemendur fræddust um eldvarnir og hættur sem geta skapast ef óvarlega er farið með eld. Á eftir fengu börnin að fara út og skoða slökkvibíl og sjúkrabíl. (Myndir)

25.11.2010

Alnæmissamtökin á Íslandi heimsóttu 9. og 10. bekki

Á mánudaginn heimsótti Einar Þór Jónsson frá Alnæmissamtökunum á Íslandi unglingana okkar í 9. og 10. bekk. Erindi Einars var mjög áhugavert og fræðandi og tókst honum að ná vel til unglinganna okkar. Krakkarnir fengu einnig í hendur vandaða bæklinga með ýmsum fróðleik um HIV og alnæmi. (Myndir)

22.11.2010

Góð gjöf frá Foreldrafélagi Hvaleyrarskóla

Á degi íslenskrar tungu, 16. nóvember sl., komu Sveindís Jóhannsdóttir formaður Foreldrafélags Hvaleyrarskóla og Gísli Guðlaugsson varaformaður  færandi hendi og gáfu skólanum glæsilegt ræðupúlt. Skólinn okkar leggur mikla rækt við það að nemendur læri að koma fram og flytja mál sitt skýrt og áheyrilega. Það er örugglega ekki í mörgum skólum, en í skólanum okkar eru ræðupúlt í öllum kennslustofum. Okkur hefur hinsvegar vantað fallegt ræðupúlt til að hafa í hátíðarsal skólans. Við færum stjórn Foreldrafélags Hvaleyrarskóla kærar þakkir fyrir þessa veglegu gjöf sem mun prýða skólann okkar á komandi árum. (Myndir)

Mikið um að vera í vinaviku

Það er búið að vera mikið fjör í vinavikunni okkar. Hér fyrir neðan má líta myndir sem meðal annars voru teknar í vinasamverum í yngri deild og miðdeild og í heimsóknum nokkurra vinabekkja.

Vinasamvera á morgun

Á morgun, miðvikudaginn 13. október verður haldin vinasamvera í yngri deild og hefst hún um kl. 8.30. Þar munu nemendur í 1.-4. bekk syngja nokkkur vinalög sem þau hafa verið að æfa. Eins og áður hefur verið greint frá mun foreldrafélag skólans afhenda skólanum gjöf við þetta tækifæri. Foreldrar eru hvattir til að koma og taka þátt í þessum viðburði.

Galíleósjónaukar

Fyrir nokkrum dögum heimsóttu Sævar Helgi Bragason og Ottó Elíasson okkur í Hvaleyrarskóla og færðu skólanum að gjöf tvo Galíleósjónauka auk heimildarmyndarinnar Horft til himins og tímarit Stjörnuskoðunarfélags Seltjarnaness. Einar Jónsson náttúrufræðikennari ásamt nemendum í 10. bekk veittu þessari veglegu gjöf viðtöku sem á örugglega eftir að nýtast vel í skólanum okkar.

Vinavika í Hvaleyrarskóla

Í næstu viku höldum við vinaviku hér í Hvaleyraskóla. Við munum tileinka vináttunni sérstaklega tvær kennslustundir á dag, en þar fyrir utan munu kennarar flétta viðfangsefninu inn í allt nám barnanna. Meðal viðfangsefna sem unnin verða eru stofnun vinabekkja. Allir bekkir munu eiga vinabekk og verður fyrsta samvinnuverkefnið þeirra að gera saman vinabönd. Farið verður í ýmsa leiki sem efla vináttu og traust, spiluð félagsvist, örmót og fleira. Unnið verður með tónlist þar sem áherslan verður á vinalög. Þá fáum við einnig góða gesti í skólann.

Á miðvikudagsmorguninn munu yngri bekkirnir koma saman á sal og syngja vinalögin. Við það tækifæri mun foreldrafélag skólans afhenda skólanum gjöf í tilefni af 20 ára afmæli skólans sl. vor. Allir foreldrar eru velkomnir að líta við hjá okkur og taka þátt í starfinu.

Vinavikan endar á því að við förum öll saman í vinagöngu niður á Ásvelli þar sem brugðið verður á leik.

Starfsfólk á námskeiði um eineltisáætlanir

Á skipulagsdeginum 28. september sl. fengum við Guðjón Ólafsson sérkennslufræðing í heimsókn með námskeið sem fjallar um leiðir til að fyrirbyggja og leysa samskiptavanda. Mikil ánægja var meðal starfsfólks enda nær Guðjón vel til fólks með þessum brýna boðskap. Allir voru sammála um að þetta hafi verið mjög gott og lærdómsríkt námskeið.

Alþjóðadagur kennara er í dag, 5. október